palais

Palais, m. ac. Est proprement (comme dit l'Empereur Constantin en la loy unique Depalatiis et domibus dominicis, au 12. l. du Code) l'hostel Royal, ou Imperial, Domus Regia Augustana. L'origine du mot vient d'un des principaux monts de la ville de Rome dit Palatium, auquel estant posée la premiere situation de ladicte ville: Romulus premier Roy d'icelle, establit son auberge Royal, où depuis habiterent grande partie de ses successeurs Roys. Finalement fut en ce mont establi le siege de l'Empire, et l'hostel Imperial; Si que depuis Auguste tous les Empereurs Romains y habiterent. Et à cause de ce est venu l'usage, que toute maison de Roy estoit anciennement appelée palais. L'Italien et l'Espagnol retiennent cet usage encores: mais ils communiquent aussi ce mot à toutes grandes maisons d'edifice somptueux, ores qu'elles soient à seigneurs particuliers, inferieurs à Monarques, et autres seigneurs souverains: ce que le François ne fait pas. Et si bien nos Roys ne se logent dés jadis en leurs maisons qui retiennent encores le nom de palais, si y logeoient-ils anciennement. Et pour marque de cette demeure Royalle, voit-on au palais à Paris estre celebrez les nopces et festins Royaux, et des enfans de France, et les Monarques estrangers y estre par grandeur logez et traictez. Nicole Gilles en la Chronique de Philippes le Bel: Ledit Roy Philippe, et ses deux jeunes fils, Philippe et Charles, le Roy d'Angleterre, et plusieurs Seigneurs, Barons, chevaliers desdits Royaumes se croiserent, etc. Et peu apres: Et fut la feste tenuë au palais de Paris, que ledit Roy Philippe avoit de nouvel fait edifier de tres-bel et somptueux oeuvre, par Enguerrand de Marigny (Or estoit cestuy Comte de Longue-ville, et general surintendant de ses finances, et fut basti ce grand palais Royal de lez la saincte Chapelle que le Roy S. Louys avoit auparavant fait edifier, et joignant le petit palais, qui est à present dit la sale S. Louys) et poursuivant ce propos dit peu apres: Et estoient à ladicte feste lesdits trois Roys de France, d'Angleterre, et de Navarre, Mais la demeure ordinaire de nos Roys n'y est plus usitée. La Cour des Pairs, le lict Royal de justice, le Parlement, le Thresor et chartres de la couronne, les statuës de nos Roys par ordre successif de leurs regnes, avec la marque du temps de la durée d'un chacun d'iceux, et des années de leur trespas, escrite aux pied respectivement de chasque effigie, les comtes et plusieurs jurisdictions y sont. La plaidoirie y est exercée, les procez y sont demenez et vuidez, qui est la raison que les hostels ausquels sont tenuës les autres Cours de Parlement en ce Royaume, ont aussi le nom de palais: mesme ce mot Hostel, que plusieurs officiers de la maison du Roy retiennent encores, est allé en desusage pour la maison Royale, et use-on de chasteau: ou de quelque nom propre. Ainsi dit-on le Louvre pour l'hostel Royal sis à Paris; ou bien le chasteau du Louvre.

Le palais de Paris, Basilica Parisiensis, vel Palatina. B.

Les gens du palais, Homines e conuentu basilicano. B.

Jours de palais, ou d'autre justice ou jurisdiction, Dies festi profestique ac justitiae colendae dicati. B.

Ne pouvoir laisser le palais, sa mere nourrice, jusques à la mort, Basilicam almam suam nutricem vltimum salutare ante diem fati nequire. B.

Les jours qu'on ne va point au palais, Les jours qu'il est feste au palais, Dies halcyonij basilicae Palatinae. B.

Les poursuivans au palais, Candidati basilicani, et gratiae curialis competitores. B.

Bastir un palais, ou sale, où le senat se puisse assembler, Curiam facere.

Le fait du palais, et de la plaiderie, Actus forensis.

Doctrine du palais, entre Princes, est la doctrine de courtoisie, civilité, moeurs, contenance, deportemens en dits et en faits, et l'institution de ce qui appartient à chevalerie, en laquelle tous jeunes damoiseaux sont introduits és maisons et courts Royales. L'espagnol l'appelle Criança, (dont il estime le maistre souverain estre le Romant d'Amadis) Nicole Gilles en la Chronique du Roy Loys troisiesme: Le Roy print l'enfant Richard entre ses bras, disant au peuple de Normandie qu'il estoit là venu pour garder le petit Duc Richard, et l'ensaisiner de sa terre, et promit aux bourgeois de Roüen qu'il le feroit bien introduire et apprendre en la doctrine du palais, et qu'il vengeroit la mort du Duc Guillaume son pere.

Le palais de la bouche, Palatum.

Palais qui sent incontinent la bonté ou mauvaistié d'une viande, Palatum sagax in gustu.

Palais au lievre, ou laicteron, Sonchus, Cicerbita.

Thresor de la langue françoyse. Jean Nicot.